ആദ്യമായിട്ടാണ് അഛന്റെ താളനിബദ്ധമായ ഒരു കവിത ‌നേരിട്ട്‌ ഓഡിയോയും വീഡിയോയും കൂടി ചേർന്ന് എടുക്കുന്നത്‌. മറ്റ്‌ എല്ലാ കവികളുടെയും അങ്ങനെ എടുക്കാറുണ്ട്‌. ചൊല്ലുമ്പോൾ തന്നെ ഈണമിടുന്ന ഒരു പ്രക്രിയ ആയതിനാലും അഛന്റെ കവിതയിൽ ചില നാടൻ പദപ്രയോഗങ്ങൾ വരാറുള്ളതു കൊണ്ടും അതിനു വേണ്ടി തുനിഞ്ഞിരുന്നില്ല. ഓഡിയോ റിക്കാർഡ്‌ ചെയ്തിട്ട്‌ പിന്നിടുള്ള ചുണ്ടനക്കൽ ആണുണ്ടായിരുന്നത്‌. ഈ കവിത കുറച്ച്‌ ദൈർഗ്ഘ്യമുള്ളതു കൂടിയാണ്‌‌‌. ഒരു ബീഹാറി നാടൻ കഥയാണ്‌ ഈ കവിതക്ക്‌‌ അവലംബം. കവിയും അവതാരകനുമായ ബീയാർ പ്രസാദിന്റെ ആമുഖത്തോടു കൂടി ഈ കവിത യൂറ്റ്യൂബിൽ പങ്കു വെക്കുന്നു.

കഠിനം ( വിജയലക്ഷ്മിയുടെ കവിത )

എന്റെ ജീവനേ, വിദൂ-
രത്തു നിന്നിതാ സ്നേഹ-
ചുംബനങ്ങളാലൊരു
ഹൃദയം വിളിക്കുന്നു…

ഇന്നു രാത്രിയും മായാ-
നിദ്രയിൽ നാമൊന്നിക്കെ
ദിവ്യമാം അമൃതത്തിൻ
ചഷകം തുളുമ്പുമോ ?

പ്രണയോൽക്കടമായ
ദിനരാത്രങ്ങൾ നമ്മിൽ
ഹിമവർണ്ണമാം സ്നേഹ-
സ്മാരകം ചമയ്ക്കുന്നു…

മാഞ്ഞുപോം വെളിച്ചത്തിൽ
ഒരു പൊന്മുഖം, ദൂര-
സൂര്യനായ്, അതിൻ രശ്മി
തൊട്ടു ഞാൻ തിളങ്ങുന്നു…

വനവഹ്‌നിപോലെന്നെ
വിഴുങ്ങും പ്രണയത്തിൻ
അരികെ നിൽക്കെ, സഖേ,
അങ്ങേയ്ക്കു പൊള്ളാറുണ്ടോ ?

അറിയില്ലെനിക്കിതു
കെടുത്താൻ – സ്വയം ദഹി-
ച്ചടിയും വരെ- നോക്കി
നിൽക്കുവാൻ അങ്ങേയ്ക്കാമോ ?

“അച്ഛൻ”

അറിയാത്ത വാക്കുകൾ
അടുക്കി വച്ചെഴുതിയ
അത്ഭുത കഥയാണച്ഛൻ

നിറക്കൂട്ട് തെറ്റി വരച്ചാലും
മനസ്സിന്റെ താളിലെ
നിറമുള്ള ചിത്രമാണച്ഛൻ

ഭീതികൾ നിറയുന്ന കൂ
രിരുൾ വീഥിയിൽ
തെളിയും നിലാവാണച്ഛൻ

സുഖനിദ്രയേകാൻ
മധുര സ്വപ്നങ്ങളായ്
തഴുകുന്ന കാറ്റാണച്ഛൻ

തെളിയാത്ത പേന കൊണ്ടെഴുതുന്ന
സ്നേഹത്തിൻ പാടാത്ത
കവിതയാണച്ഛൻ

അലിവിന്റെ കടലായ്
വിയർപ്പിന്റെ
വാത്സല്യത്തിരമാലകളാണച്ഛൻ

തളരാതെ കാക്കുന്ന തണൽ മരമായി
നേരിന്റെ വഴിയോതുമച്ഛൻ

കാലിടറുമ്പോൾ
കാണാത്ത കൈകളായ്
താങ്ങുന്ന ചിന്തയാണച്ഛൻ

അറിയാത്ത പൊരുളായ്
പറയാത്ത രഹസ്യമായ്
മായാത്ത സത്യമാണച്ഛൻ
രചന:
വി പി ശ്രീകാന്ത് നായർ